Home / archiefcentraal / denne van knoldert

denne van knoldert

D’r leup lest een man van Synovate döar de trein. De man deud een reizigersonderzuuk. Zei e. Gin kaartiesknipper dus, mar een reizigersonderzuker. Iederiene leut netties zien kaartie ziene. Doarnoa keken wie as reizigers mekare wat schoapachtig an. Wat deud die man, wat wol e weten, wat ging e doene met de gegevens?

Wat een slaafse luu binne wie eigenlijk, bedach ik mie. Kump d’r iene langs die zeg det e wat onderzöch, en wie werkt d’r ollemoal braaf an mee. Toen de man van de wekke wear langs kwaamp vreug ik ‘m noar zien reden. “Dan niet”, zei e en leup wieders zonder mien kaartie te controleren. Mar in plaatsen det ik applaus krege van de coupé, keken ze mie an met oong die zeiden ‘woar bemuui ie oe met’.

Ik had det van de wekke ok toen ik bie de bandenplakker vöar het wiel van mien anhanger bie het betalen name, adres, tillefoonnummer en zelfs mien emailadres mosse opgeem. Ik was halverwege mien tillefoonnummer toen ik er de brui an gaffe. “Hebt ule niks met te maken”, besleut ik, woarop de man achter de kassa mie verrast ankeek. Zonder emailadres, gin nieuwsbrief. Det bleek de consequentie. Doar kon ik goed met leam.

Het werk van de reizigersonderzuker betaalt trouwens slecht, lik mie. Toen ik de sjofele man an zag komm’, mos ik gelieke denken an de reclame van ‘Mieke van negen spölt vandage met haar nieuwe Barbie. Sjarda in India spölt met haar leaftiedgeneutie op dit moment met een vieze oale man spölt. Stop kinderprostitutie.’

Ik geef toe, ik mut de Synovate-man niet be-oardelen op zien uterlijk. Mar ja, be-oardeel ik ‘m op zien werk, dan wördt dit stukkie d’r ok niet vrolijker op. Want wat kan de man feitelijk met de gegevens oaver oonze treinkaarties? Bie de NS weet ze toch precies welke kaarties d’r verkocht bent en hoevölle OV-joarkaarten d’r onder het volk zit?

Mar ja, ik weet ok niet mear wat logisch is. Ik zie steeds overheidsspotjes op de tv det wule in huus reservewater op mut sloane vöar as wie onverhoed een wekke op’eslötten wördt döar ien of andere ramp. Tuurlijk doe ik det al een paar moand heel keurig, vermoedelijk net as ule ollemoal. Mar noe heb ik een vroage: hoe lange blif det water vers? Hoe vake mut ik de reserverväorroad verversen? En mag het ok bier weane in plaats van water? Is d’r een Synovate-mannegie die det onderzöch?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.