Ik krege een brief in de busse van het CAK. Een brief, een brochure, uutleg en een nota. Mar ik snappen d’r niks van dus heb ik de pröttel in de prullenbak egooid. Twee moand later kreeg ik wear een brief van het CAK met een nota d’r bie. Toen heb ik mar eam ekeken wat het was. Het centraal administratiekantoar, las ik op internet. Toen wus ik dus nog niks.
Wat is een centraal administratiekantoar? Wat doet ze centraal? En vöar wie doet ze de administratie? In brief, brochure en nota stund het niet, dus zol het wel een groot kantoar weane met meansen d’r in, die de hele dag heel druk bent met dinge woarvan de butenwereld gin weet hef.
‘Het CAK berekkent en incasseart de eigen bijdragen voar de Algemene Wet Bijzondere Ziektekosten (AWBZ) en de Wmo’, stiet d’r op de site van die luu. Aha, wie hebt hier dus te maken met een oaverheidskantoar. En bliekbaar mut ik betalen vöar biezundere ziektekosten. Mar wat bent det, biezundere ziektekosten? Bent d’r ok gewone ziektekosten?
Het CAK regelt ok de eigen bijdrage vöar de Wmo. Det is gek. Wmo is toch de waterleidingmaatschappij Overijssel? Wear verder google-end kwam ik d’r achter det de Wmo ok een wet maatschappelijke ondersteuning is. As een padvinder iemand het zebrapad oaverhelpt. Is det maatschappelijke ondersteuning? Vaste wel, mar mut ik doar dan een eigen bijdrage vöar betalen? Dan kom ik ok zelf wel an de oaverkaante van de weg.
Op de nota van het CAK stund det ik een eigen bijdrage vöar zorg zonder verblijf mosse betalen. Zorg zonder verblijf? Ik had wel zörge had. Oaver de wichter die völ te late thuus komt noe de Leeren Lampe wear open is. Oaver het tuinfeest van laatst, terwijl het de hele dag zol goan rea’ng. En zörge oaver die staatssecretaris met dubbel paspoart. Hef Maxima det ok niet?
O ja, dree kwart joar terugge had ik ok zörge. Van de thuuszorg, die mossen mie twee kear daangs een spuite in de linker boam-arm zetten. Det was noa det ik in het ziekenhuus terechte was e komm toen ik met de fietse oaver de kop was egoane. ‘Zörg zonder verblijf’ was det niet want ik had een dage in het ziekenhuus … O wach eam, ik leas het noe op de site, zörg zonder verblijf is de vroggere thuiszorg.
Ik begriep het, ik mut de wijkzuster betalen. Det doe ik graag, want het was een besten.
Denne van Knöldert
Meer foto's