Denne: de tied vlög

De tied vlög. Toen ik mien earste verhaaltie in het plat schreve haan wie nog een joar of viefe te goane in de vöarige eeuw. Det is mear dan duzend verhaalties terugge. Noe ik mie det zo bedenke, heb ik een jubileum vergetten te vieren.

Mar gelukkig telt iederiene en alles döar, dus heb ik van de wekke een ander jubileum te feesten. Die van mien moat. De man wördt 60, zo’n leaftied det ie de feessies iets minder uutbundig viert. Want ja, wie is d’r noe ècht blie met 60? En vrogger was ie noa zo’n feest eenhalve dag later’n oalen wear. Mar ja, det was vrogger.

Noadeel – vöar de kammeroaden dan – van zo oald wönn is ok det ie op een gegeven ogenblik niet mear weet wat ie cadeau mut gee’m. Toen e 50 wönn, heb ik met mie zelf al of’esprökken öm op tussenliggende joaren met löage handen te komm’. Mar op de döar vijf deelbare leaftieden is het toch wel de bedoeling iets te kopen. Iets treffends.

Mar wat? Een vest, sökken of neeje onderbroeken, det loat ik an zien vrouw en wichter oaver. En wieders, ie kent det wel, as ie vroagt wat e wul hemm’: ‘Ik heb alles al’.

Noe bedach ik mie det mien moat op onze zundagse wielrenröndties wel wat mear achter mie an mag fietsen. Ik ben immers nog lange gin 60. Mar det is een bittie een raar cadeau. Hij kik graag noar kunties, mar die van mie? Ik betwiefel det.

Bie toeval höaren ik det zien familie ‘de tied vlög’ heel letterlijk vertaalt in hun cadeau. Mien moat mag vanof Teuge een rondvlucht maken boa’m zien Salland. Ik heb beslötten doar mien cadeau an an te passen. Ik heb mie een reclamespandoek an’eschaft vöar achter det vliegtuugie an.

Dus as de 60-joarige oaver Salland cirkelt en ongetwiefeld een hilleboel foto’s maakt, dan zal e verbaasd weane oaver de andacht die hij vanof de grond krig. De tekst die ik besteld heb:

‘Ik ben 60 ‘ewönn, graa drie kear toeteren’

Doet ule met?

Denne van Knöldert


|Doorsturen